CCLXXXIV.

1393, Februar 23. Patschkau.

Bürgermeister und Rathmanne der Stadt Patschkau bezeugen, dass der Scholz von Baitzen alle Ansprüche auf sein Gericht durch eine Geldsumme abgefunden hat.

In gotis namen amen. Wir Niczco Los burgirmeistir, Peczco Freiburg, Johannes Swanowicz, Johannes Kesemann vnd Petrus Neuwensteter, ratmanne czu Paczkow, tun kunt vnd bekennen offintlich in desim keginwortegen brife allen den, dy en ansehn, horen und lesen, das vor uns komen ist in eynen siczczenden rat der erber man Nicze Ebirhart, vnser liebir mitburger vnd hat vns vorgelegit, wy seyn swagir Hannus Czeisk eyne ansproche hat gehabt yn vnd uff das gerichte czu dem Byczan vmbe vetirlich vnd vmbe mutirlich angefelle vnd vmbe wedirgefelle seyner geswisterynne, vnd dy selbe ansproche hette her ym vorreicht vnd gebin czu fordirn uf gewyn vnd uf verlost, vnd do mete czu tun vnd czu lasen noch seyner freien willekur, vor dem erwirdegen vatir in gote vnd heren, her Johannes von Bresslav, apte czu Camencz, vor brudir Gobil den foyte vnd vor andirn erbirn leuten des egenantin clostirs undirsesen. Des hat der vorgenante Nicze Ebirhart, den erbirn man Mertin Goltsmyt, schultheisen czu dem Byczan ouch vnsirn lieben mitburgir angesprochin vmbe das egenante angefelle vnd wedirgefelle also lange, daz dy erbirn vnd wizen heren vnd leute, der egenante here, her Johannes apt, Gobil der foit, Mertin schultheis von Reichenav, Nicolaus schultheis von dem Schrome, Nicze Los, Henricus Kochemeistir vnd Nicze Kreczmer, burgere czu Paczkav, dorundir gerett vnd geteidingit habe, also zunleute vnd vorrichtleute, das der egenante Mertin Goltsmyt hat gegebin den vorgenantin Niczen Ebirharden von seynes swagirs wegin, Hannus Czeisken des egenantin, eilf marg Pregischir groschin Polennischir czal, dy her ym ouch gancz vnd gar vorgolden vnd vorricht hat, das ym doran wol genuget hat, vor alle ansproche vnd vor alle forderunge, dy der egenante Hannus Czeiske, seyne geerbin vnd alle andir seyne rechten elichin nochkomelingen, nu vnd her noch in den czukunnftegin geczeiten mochten gehabin yn vnd uff daz egenante gerichte czu dem Byczan vnd czu des selbin gerichtis besiczczere vmbe vetirlich vnd vmbe mutirlich angefelle vnd wedirgefelle seyner geswisterynne, vnd vmbe alle andir sachin, wy man dy benennen mochte, der weren vil adir wenig, gros adir cleyn, nichts vsczunemen. Dorobir hat sich der vorgenante Nicze Ebirhart vorczegen, von seyner wegin, von seynes swagirs Hannus Czeisken wegen, ir geerbin vnd von allir andir ir rechten elichen nochkomelingen wegin, den vorgenantin Mertin Goltsmyt, seyne geerbin vnd alle andir seyne rechten elichen nochkomelingen vnd das gerichte czu den Byczan, vnd des selben gerichtis besiczczere nymmer anczulangen noch anczusprechin mit worten, noch mit werken, noch mit keynem rechte, geistlich noch wertlich, vmbe keyn vetirlich noch vmbe keyn mutirlich angefelle, noch vmbe keyn geswisterynne wedirgefelle, noch vmbe keynerlei andir sachin, wy man dy benennen mochte, se sey gros adir cleyn, se sey vil adir wenig, nichts vsczunemen, an allerley newe funde nu vnd ewiclich. Geschen vnd gegebin czu Paczkow an Allir mannefasnacht noch gotis geburt dreiczenhundirt iar vnd in dem dritten vnd newnczigisten iare vndir vnsir stat ingesegil. Dobey seynt keginwortig gewest vnser eldisten vnd gesworen: Symon Lossowicz, Leutko Foyt, Albertus Falcz, Mertin More, Petir Girlach, Niclos Fynke, Jocop Dreisigmark, Jocop Wigil, Fettirhannus vnd Johannes vnsir statschreiber czu geczewgnis.

Or. Perg. Das wohlerhaltene S. der Stadt Patschkau (vgl. No. CXLI.) an einem Pergamentstreifen.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 10, Urkunden des Kloster Kamenz. Hrsg von Dr Paul Pfotenhauer, Breslau 1881.